Kaafi intezaar ke baad, aaj thand ne dastak dena shuru kiya hai. Humidity aur garmi se pareshan logo ko aaj thand ki aahat sunayi di hai, haan pyari si gulabi si thand aa gayi hai…

Mujhe to thand ka mausam hamesha hi achcha lagta aaya hai. Aisa nahi hai ki mujhe barish aur garmi ka mausam pasand nahi. Pasand to wo bhi hain par thand ka mausam kuch jyada pasand hai. Aur phir is mausam me achcha bahut kuch hai aur bura kuch jyada nahi jaise barish achchi to lagti hai par uske baad ka keechad na baba na… aur garmi me aam, tarbuj khana to achcha hai par garami se jab paseene chhootne lagte hain uska kya?? Aur to aur din ke samay kahi nikalana tak dubhar ho jata hai garami me to.

Main to khaane ki bahut shaukeen hoon aur thand mast khane peene ka seaon hai. Aur sabse badi baat, mere sare favorite fruits isi season me milte hain jaise Sitaphal (Cusrtad Apple), Singhade (Water chestnut) aur Amrud (Guava). Haan, sach me singhade aur sitaphal ka to maja hi kuch aur hai. Mujhe yaad hai jab bhi main ghar jati thi thand ke mausam me papa bina kahe hi dher sare singhade aur sitaphal le aate the. Aur aaj bhi yahi hota hai.

Iske alawa meri pasandida sabjiya jaise matar aur gajar bhi thand me aati hain. Aaaha.. soch ke hi muh me pani aa jata hai… matar se to har sabji ka taste hi duguna ho jata hai… 🙂 Wo matar ki sabji me parathe chur chur kar khana.. wah!!!

Phir makai ki roti, bajare ka khichada, gehu ka khichada, makai ke dhokle aur urad ki daal, thand ke laddoo, til ke papad aur laddoo, shakarkand (Sweet Potato), ratalu, garadu(Yam) yum yumm…  kitna kuch tasty-tasty sa khana thand se juda hai…

You know yahi ek mausam hai jab mujhe hostel me rahna sabse jyada bura lagata tha.. mujhe yaad hai main apani room mate ko kitna pareshan kar diya karti thi in sab cheejo ki baate karke aur ye kah-2 ke ki mujhe ye khana hai wo khana hai… aur hostel me to ye sab mil pana namumkin tha… jab nayi-2 aayi thi ghar se bahar rahne tab bahut yaad aati thi in sab cheejo ki…

Bachpan me dadaji thand ke dino me dry fruits aur pind khajur laya karte the aur hum bachche usi lalach me unke aas pass ghooma karte the. Aate to aaj bhi hai ye sab but ab wo pahle jaisi baat nahi hai… Jaise-2 hum bade hote jate hain, cheeze chhoti hoti jati hai hamare liye…

Aur haan ek aur cheej jo thand se judi hai aur mujhe bahut pasand hai wo hai chyawanprash. Roj raat ko chyawanprash khakar bournvita wala dhoodh peena bhi thand se judi yaado me se ek hai.

Aur phir wo rajai me dubak kar sona, subah aalas karte huye baar-2 rajai ko aur tight odh kar soye rahna, mummy ka awaaz lagate rahna aur phir haarkar bed tea la dena taki chai ke liye to main uth hi jau… ha ha ha…

Wo school me baat karte samay muh se nikalati bhaap, thand se akade huye haath jo jeb se bahar hi na aana chahe, bathroom me baith ke paani ki bucket ko dekhte rahna jaise ki shayad hamare dekhne se pani apne aap garam ho jayega… Dadi ke sath chhat pe dhoop me baithna aur dhero baate karna, December-January me patange udana, gilli danda khelna ye sab bahut hi pyari si yaade hain.. jo bachpan ke thand ke dino se jusi hain.

Haan, mujhe patang udana bahut pasand tha… garmiyo me hamari pocket money comics pe kharch hua katrti thi aur thand me patango pe. Main aur meri ek friend school ke baad din din bhar patange udaya karte the.. udana to aata nahi tha so udate to kam, phadte jyada the… par phir udate-2 aakhir seekh hi gaye the hum dono patang udana.. aur aaj sochti hu to achcha lagta hai ki mummy – papa ne kabhi is sab masti ke liye roka toka nahi… warna ye maja chhoot gaya hota humse. Ab to patange hi bahut kam udati hain.. ab kaha time hai kisi ke pass is sabke liye aur agar time ho to bhi logo ko ab ye kaam high class ya yu kahe ki sophisticated logo ke liye sahi nahi lagte hain..

Khair, mujhe to aaj bhi mauka mile to main patang udana pasand karungi… patang ko aasman me dekh ke lagta hai jaise main khud kahi dur ud rahi hu.. sari tensions se dur, khuli hawa me… maje se bah rahi hu.. 🙂

To, bas yahi sab pyaari si yaade aur bahut si tasty khaane ki cheeje hain jis se mujhe thand ka mausam achcha lagta hai aur ek tarah se to mujhe intejar rahta hai thand aane ka… aur aaj lag raha hai ki ab aur intezaar nahi karna padega is saal… 🙂 😀

Happy Winters!!!

Advertisements